Un estraño virus ou os pesadelos do Sr. Alcalde

Un estraño virus percorre Fene, xa sei, esto é parecido a “Un espectro percorre Europa...” Manifesto comunista de Marx e Engels. ¡Ave María purísima!, ¡a onde me foi dar a miña cabeza, 160 anos cara a tras ! Estás desvariando, dirán os que se esforzan en soterrar ao marxismo ( “neocons” e socialdemócratas) e o marxismo ao igual ca Lázaro empéñase en resucitar. Un virus non é un pantasma nin un espectro pero é tan resistente aos antibióticos coma os pantasmas ¿Cal é o virus que percorre Fene? Temos información de que se pasea pola Alcaldía coma Perico pola súa casa ¡Pobre Ivanciño! Témoslle aprecio ao alcalde, e é unha magoa que estea afectado por ese virus a persoa que pensou que gobernar era o mesmo ca construír un discurso lindo con catro palabras e media, por eso mesmo lle está afectando o virus. ¿Que facer? (como diría Lenin) , os remedios son paliativos, contra os virus compre empregar menciña preventiva e contra este en concreto tiña que saber o alcalde que precisaba de capacidade para escoitar, para se informar, para xestionar e para tomar decisións. Non estamos a dicir que non teña esas capacidades o que parece é que ten dificultade para usalas na acción de goberno. Para chegar ao concello Iván liderou a conxura contra o Dr. Yáñez pero como o mundo non para de dar voltas ¿será o Dr. Yáñez quen vaia menciñar a Iván?. Arredista, un lector ben informado deste blogue, pensa que si ¿Terá o alcalde pesadelos co Dr. Yáñez ?

O Rei de bastos fai un desmentido: "Eu non son Antón Nonceda"

Eu nunca mandei cartas ameazantes aos traballadores do Concello, nin amedrentei a delegados sindicais para impedir a súa labor de representación, sempre respectei e escoitei as propostas dos demais e detesto a falta de educación . Se aparecen por aí caricaturas miñas, que amosan moito parecido coas do concelleiro Antón Nonceda, teño que dicir que se deben a crueldade que o debuxante practica con migo. Son o rei de bastos, non son nin quero ser o señor Nonceda

Asinado: A súa maxestade o Rei de bastos

A venda da xustiza-20 N

Houbo unha grande crueldade. Mataron pais de bebés e despois deron esas criaturas a amigos dos asasinos. Nenos e nenas, con pais asasinados, medraron baixo o mesmo teito ca os criminais do aparato político- militar e paramilitar da dictadura; estou a falar de Arxentina. Para que os crimes quedasen impunes vendáronlle os ollos a xustiza coa lei de punto final. A presión das mais e as aboas da Praza de Maio consegue derrogar a lei. Agora eu quixera ser arxentino. Aquí, en todo o Estado Español, houbo monstruosidades maiores: as cunetas foron o fin do viaxe das sacas das cárceres do franquismo, confesión e pelotón de fusilamento. A Igrexa, faltaría máis, bendicindo o crime. Moitos persoas que hoxe andan polos setenta anos foron bebés roubados a uns pais asasinados e non o saben. O Fiscal Xeral do Estado, o Consello do Poder Xudicial, o Goberno, e por suposto os herdeiros da dictadura, compiten por apertar o nó da venda da xustiza coa lei de amnistía. Entre todos os demócratas podemos tronzar a venda

Alcalde en Nova York

O Sr alcalde estivo en Nova York ou New York ¡Parabéns! Non dixo que se entrevistase con Obama, faltoulle pouco: unha case- entrevista de un alcalde, case- estadista, co presidente electo dos USA ¡Manda truco! e nós sen o saber. É o primeiro alcalde dun concello da UE que case se entrevista co primeiro presidente negro dos USA. Para nós é unha case- alegría moi grande, só hai algo que non nos gustou: por mor da súa humildade case non nos decatamos de que viaxara vostede aos Estados Unidos de Norteamérica , e o que case non lle perdoamos e que nos ocultara esa case- entrevista con Barack Obama. Polo demais o dito: ¡parabéns!

Asasinar ideas

Os peores asasinos son os que queren matar ideas para despois impor as súas co berro cuarteleiro ¡ar ! Son os máis sanguinarios, como as ideas non seguen o ritmo das marchas militares, e non as poden destruír con balas, empregan a dialéctica de puños e pistolas contra as persoas. É certo que sempre houbo este tipo de individuos pero eso non pode evitar que nos preguntemos ¿porque a fiscalía non actúa de oficio cando algún Ynestrillas fai apoloxía do golpe de estado ?¿Porque en Internet hai webs ou blogues con contidos xenófobos e racistas, xa que logo claramente delictivos , e non se fai caer sobre os seus autores o peso da lei? ¿ Quen apadriña ao fascismo por un puñado de votos?